एकांकीचा देव ओवाळू

एकांकीचा देव ओवाळू जीव कर्पूर ज्योती ।

लीळा स्मरीता रजतम पापे विलयाला जाती ॥धृ० ॥

भरवस नगरी प्रगट होऊनी क्रीडला परमेश ।

क्रीडत क्रमाने येता झाला श्रीप्रभू भेटीस ।

विरक्त अवस्था अंगिकरुनी आला कांतीस ।

पुढा विंध्याचल पावन करण्या मुक्ताबाईस ।

ससा रक्षीला जानू स्थळी चुकविली दुर्गती ।

गोंड भिल्ले बोल्हा बारी भक्त वर्णु किती ॥१॥

आंध्रप्रदेशी भक्त हेडावू हंसाबादिक ।

चर्मकार सुखी करुनी सांडीला घोडाचुडी शिष्य ।

दाभविहीरी विप्र वेधला रुपनायक ।

डाक सेंदुर्जन भोग भंडारा अळजपूर निक ।

द्यूतक्रिडेचे जुवारी जगदानीचे गुण गाती ।

रांधवणीया बहु वेधल्या तैल्यकारा स्थिति ॥२॥

राहेर नांदेड प्रांत जीवविले प्राणी अनेक |

चोर खिरारी गोवारी लाहासी अरण्य महिख ।

ठाकूर भार्या कळावी बिरवणे सिध्द वऱ्हाडिक ।

पहुड उकरडा भगवे दोन्ही मठपती एक ॥।

विष्णू स्वामीची गुटीका सिध्दी आंब उच्चारिती ॥

द्विज गोरक्षण राणभेरी गोपचोंडी लपविती ॥३॥

वेठी जाणे अधिकार्या अन पुन्हा अळजपूर ।

वडनेराहुनी आंबजई वासनी आलेगाव पातुर ।

विषयी आंजनी मेहकर करुनी दुबार लोणार ।

त्र्यंबक यात्रे पव्हा निघाला करीत गंगातीर ।

सप्तवार घटी कर लावुनी चोर कुमती हरती ।

जन्माष्टमीसी पूजा महीषा युध्द निवारिती ॥ ४ ॥

रामसगावाहुनी आला पैठणी देव बाईसाचा ।

क्षौर भोगावती विडा उचलीला जीव उद्धरण्याचा ।

प्राकृत छंदामध्ये गाईला एकांक श्रीहरीचा ||

श्रीदत्ताचा मंत्र सुत अन सेवक ऋषीमुनीचा ।

त्रिकाळ लीळा स्मरण करीता रोग बाधा जाती ।

जन्म मरण फेरा चुकोनी होय ईश प्राप्ती ॥५॥