उठा उठा श्रीचक्रधर राया

उठा उठा श्रीचक्रधर राया, भक्त वाट पाहाती ।

पदरी घेउनि पवित्र करुनि भक्ती देइजो जी ॥धृ॥

धरणी आशंसी स्पर्श व्हावया आपुल्याश्रीचरणाचा

विरहाग्नीने तप्त जाहली शीतल किजो जी ॥१॥

प्राण उतटुनि कंठा आणी आर्त नाही तैसी ।

औदार्याचा सिंधु माझा प्रेम देइजो जी ॥ २ ॥

प्रातःकाळी प्रभुजी उठले कृपादृष्टी वळली ।

तळमळ करिते भक्त तारिले तैसे तारिजो जी ॥३॥

अनंत सृष्टी हिंडत आलो बहु श्रम आला जी ।

कठिण कोरडा कधी मी तुमच्या पदरी पडेनजी ॥४

अनंत वेळा प्रमाद जोडुनि खंती आणिली जी ।

ऐसा मी अपराधी कैसा योग्य होईन जी ॥५॥

निमित्त बंधु महादानी तू औदार्य रावो ।

पाहू नका तुम्ही अपात्रता ही वरदान देइजो जी ||६

कवीने आपुले सुगंधहीन हे पुष्प वाहिले जी ।

सुगंधहीन ते सुगंधी करुनि श्रीकरी घेइजो जी ॥७॥

उठा उठा श्रीचक्रधर राया, भक्त वाट पाहाती ।

पदरी घेउनि पवित्र करुनि भक्ती देइजो जी |धृ