करा हो आरोगणा स्वीकार

नमो पंच अवतार करा हो आरोगणा स्वीकार ॥धृ॥

मज गरीबाचे रूक्ष कदन्न ।

गोड करावे होउनि प्रसन्न ।

दाखवितो उपहार,

करा हो आरोगणा स्वीकार ॥ १ ॥

कृपादृष्टीने अवलोकुनि ।

उच्छिष्ट आपुला प्रसाद देउनि ।

घडवावा अधिकार,

करा हो आरोगणा स्वीकार ॥२॥

अनंत जन्माचा अपराधी । अशुद्ध माझी क्रिया ही साधी

नका करू धिक्कार,

करा हो आरोगणा स्वीकार ॥३॥

पतितपावन हे दीननाथा ।

पावन करुनि घ्यावे अनंता ।

आहे तुझा गुन्हेगार,

करा हो आरोगणा स्वीकार ॥४॥

दामोदर हा सेवक आपुला । विनंती करितो पदकमलाला । नमितो मी वारंवार,

करा हो आरोगणा स्वीकार ॥५॥

नमो पंच अवतार

करा हो आरोगणा स्वीकार ॥धृ